«Мукачевскій отпустъ»

Деталі

Категорія: ІСТОРІЯ

Опубліковано: Середа, 27 серпня 2014, 13:11

Перегляди: 1955

Стаття (мовою оригіналу) із журнала «Благовѣстникъ», який видавали Отці Василіяни Провінції Святого Миколая на Закарпатті, про відпуст Успіння Пресвятої Богородиці на Чернечій Горі в Мукачеві (28 серпня 1928 р.), на якому був присутній Митрополит Андрей Шептицький ЧСВВ, за участю близько 50 000 паломників.

Мукачевскѣ отпусты въ монастыри ОО Василіянъ на Чернечой горѣ суть славными и торжественными кождого року. Головно одъ коли одорвана одъ насъ Марія Повчъ, громадяться люде на сіе мѣсто изъ всѣхъ сторонъ Подк. Руси въ огромном числѣ. Въ семъ мають велику заслугу и отцы Василіяне, котрѣ запровадили при отпустахъ новый порядокъ и стараються на то, чтобы народъ все то получивъ, что пожадаютъ его душевнѣ потребы.

Однакожъ сегорочный отпустъ въ Мукачевѣ перевысшивъ всѣ дотеперѣшнѣ отпусты своимъ огромнымъ розмѣром и особами на немъ появившимися, мае и историчное значеніе въ житю нашоѣ Подк. Руси. Николи еще нашъ монастыръ не видѣвъ такихъ высокихъ гостей, якъ метрополитъ львовскій графъ Андрей Шептицкій, имя котрого е золотыми буквами записано въ серцяхъ всѣхъ русиновъ подъ и за Карпатами; изъ далекоѣ Канады прибывъ до насъ епископъ канадійскихъ русиновъ Никита Будка, чтобы участъ брати на порадѣ епископовъ и познакомитися зъ нашими людьми; изъ Югославіѣ прийшовъ епископъ Нярадій, кого нашъ народъ такъ добре познае. Прибывъ на отпустъ и нашъ любимый епископъ Петръ, кто николи не пропускае прійти на успенскій мукачевскій отпустъ, чтобы видѣти побожность народа и зъ нимъ вьедно молитися для блага подк. руського народа. Три епископы, одинъ метрополитъ – се еще николи не было въ Мукачевскомъ монастыри одъ онъ коли стоить.

Великою почестію было для насъ русиновъ пребытіе моравскихъ паломниковъ, котрѣ прийшли подъ веденіем олумоцкого прелата графа (Ледоховского), кто прийшовъ въ имени архиепископа Пречана и сенатора Hurbana.

Нашѣ люде зъ великимъ дивованьемъ позирали на моравскихъ паломниковъ, котрѣ подобно, якъ нашѣ, Марійскѣ пѣснѣ спѣваючи вступили въ церковъ и отправляли свой молебенъ. Симъ дали посвѣдченя, что чувствуютъ зъ нами въедно и сама та вѣра кипить въ ихъ сердцяхъ, яка одушевляе и насъ.

По приблизному почисленю 50 000 людей брало участь на одпустѣ. Е се такое число, якого до теперь еще не было въ Мукачевѣ. Восемдесять священиковъ сповѣдало сю велику товпу народа одъ зорѣ до позноѣ ночи. Число сповѣдниковъ и причасниковъ было высше десяти тысячъ.

Осередкомъ празника была Св. Велика Служба, что служили три архіереѣ: Канадійскій, Крижевацскій и Мукачевскій зъ великою ассистенціею. На Св. Службѣ, св. проповѣди держали такожъ архіереѣ: Митрополитъ Андрей, еп. Діонизій и по обходѣ еп. Будка. Народ зъ великою увагою слухавъ ихъ слова архіерейскѣ и глубоко заскѣпивъ въ свое сердце; святителѣ Церкви головно про св. вѣру говорили, на что вориги изъ всѣхъ сторонъ такою діяволскою силою ненавистію нападають! Певнѣ есме, что слова сихъ великихъ достойниковъ Церкви не будутъ голосами въ пустыни, але принесутъ обильный плодъ въ духовномъ житю нашого народа. По Службѣ Божой бывъ обходъ, въ котромъ участь брали преосвященнѣ, все духовенство, процессіѣ зъ заставами зъ образами и зъ крестами, музикальное товариство Чинадѣевское и рел. товариства. На обходѣ была репрезентована и орґанизація «Пласт» Подк. Руси, делеґаты (з Праги, Ужгороду и Мукачева) стояли почену сторожу протягом цѣлого богослуженя. Прекрасный порядокъ на обходѣ хвалить працю и одданность о. игумена Булика, кто якъ и до сихъ поръ, такъ и сего року указався первопоряднымъ орґанизаторомъ одпустовъ. Его заслуга, что мимо такого великого числа паломниковъ ни найменшого непорядку не было на одпустѣ.

По одпустѣ было привѣтствовання епископовъ изъ стороны духовенства, что въ рамцѣ прекрасноѣ бесѣды выконавъ о. Ант. Фанковичъ намѣсникъ. Головно теплыми словами привѣтствовавъ Андрея митрополита и графа Ледоховского прелата Оломуцкого. Зъ великою увагою слухали бесѣду митрополита, кто давъ великѣ перспективы св. дѣла соединенія и призначивъ задачу нашого народа и духовенства въ семъ св. дѣлѣ. Всѣ присутнѣ зъ очарованіемъ слухали прекрасныхъ словъ митрополита.

Багато можно бы еще писати про сей красный день Мукачевского отпуста. Бывъ онъ потвержденіемъ нашоѣ отцевскоѣ вѣры и душевною радостію всѣхъ присутныхъ. Дай Господи Боже нашимъ архіереямъ долгоденствіе, крѣпость и здоровля, чтобы еще довго могли управляти нашимъ народомъ; подержи и укрѣпи нашъ Чинѣ Св. Василія, чтобы могли успѣшно дѣйствовати въ виноградѣ Божомъ на Подкарпатю; и дай, чтобы нашъ народъ руській зоставъ вѣрнымъ до Церкви твоего Сына и непоколебимо постоявъ подъ ударами вороговъ.

• < Попередня
• Наступна >